Esta páxina inclúe información sobre este posto laboral, a asociación e o que facemos, e os requisitos para postular a esta oferta.

Esperamos que esta información che axude a decidir se este posto é do teu interese.

Sobre Nós

Ambar é a asociación pioneira no Barbanza traballando polos dereitos das persoas con diversidade funcional dende 1982. O noso propósito é o de “Promover Vidas Independentes en Comunidade”, asegurando así que as persoas participan na comunidade en igualdade de condicións que o resto da cidadanía. Para isto, Ambar pon moito fincapé nun sistema de traballo baseado non só na promoción da autonomía nos propios servizos, se non en asegurar que a persoa aprende e adquire novos coñecementos que se poidan transferir ó seu día a día adquirindo cada vez máis soltura para poder vivir en comunidade independentemente con apoio.

Para acadar isto, Ambar presta apoio a través de diferentes servizos como son: Atención Diúrna, formación e orientación laboral, emprego con apoio, vivenda, accesibilidade, arte e artesanía entre outros servizos e programas.

Sobre o posto

Ambar está participando nun proxecto que busca definir un modelo para a medición da calidade de vida e lonxevidade saudable baseado nas metodoloxías identificadas por Schalock e Verdugo de Calidade de Vida e Escala de Intensidade de Apoios, así como outra literatura vinculada a medir a autonomía da persoa ó longo da vida e que fomente unha vida saudable e participada na comunidade.

A persoa que desenvolverá este posto terá a posibilidade de axudar a construír unha metodoloxía de traballo innovadora que pode dar lugar a un método de valoración para a atención a persoas maiores e con diversidade. Ademais, estará vinculada a un equipo de profesionais con moita experiencia práctica na implementación destas metodoloxías, un lugar onde poder validar hipóteses e testear as investigacións.   

Se es unha persoa con ilusión por cambiar a sociedade na que vivimos e xerar unha comunidade máis implicada, este traballo é para ti. 

Descrición do posto

Misión e responsabilidades

A misión deste posto é a de investigar e crear un modelo de medición de calidade de vida e lonxevidade saudable baseado en metodoloxías que teñen de base a promoción da autonomía para a vida independente.

Para acadar esta finalidade, a persoa profesional levará a cabo as seguintes responsabilidades:

Responsabilidades 

1. Identificar metodoloxías vinculadas á promoción da vida independente das persoas maiores e con diversidade, e validar cales poden ser óptimas para a creación dun modelo de medición de lonxevidade saudable.  
2. Crear indicadores de medición en base ás metodoloxías identificadas.
3. Traballar conxuntamente co equipo técnico para buscar unha metodoloxía adecuada á promoción da vida en comunidade en liña co noso propósito.
4. Crear artigos e informes sobre a metodoloxía a empregar.
5. Elaborar outra documentación, informes e xustificacións do proxecto.
6. Buscar colaboracións no sector que poidan axudar a enriquecer a proposta de medición.
7. Liderar o testeo de medición unha vez proposto o modelo.
8. Outras responsabilidades vinculadas á misión do posto.

Requisitos da persoa solicitante do posto 

• Estar realizando o doutoramento ou ter presentada a tese, idealmente nun campo afín das Ciencias Sociais.
• Coñecemento de metodoloxía e técnicas para a investigación.
• Moi bo nivel de escrita, principalmente en galego.
• Experiencia no sector dos coidados, tanto persoas maiores como con diversidade será valorable.

Como presentarse a esta oferta 

Se pensas que esa persoa, poderías ser ti, envíanos o teu currículo e unha breve explicación sobre como cumpres os requisitos do posto ó correo talento@asociacionambar.org ou cubre o seguinte formulario o antes posible.

Moitas grazas e esperamos saber pronto de ti!