Benvido/a e gracias polo teu interese neste posto. Este documento inclúe información sobre este posto laboral, o que facemos en Ambar, e os requisitos para postular a esta oferta.

Esperamos que esta información che axude a decidir se este posto é do teu interese, e saber pronto de ti!

Descrición do posto: Técnico/a Deporte Inclusivo

Sobre o posto de traballo

A persoa que desenvolve este posto ten a vantaxe de estar en contacto coa persoa con diversidade e coa información aportada polo equipo profesional dotándose de todas as ferramentas para apoiar a autonomía da persoa. Coñece e observa de primeira man os logros que cada día se acadan no desenvolvemento persoal e profesional. Se es unha persoa con ilusión por dar valor á diversidade, este traballo é para ti

Misión e obxectivos xerais do posto

A misión deste posto é apoiar o desenvolvemento de actividades que promovan a autonomía, o desenvolvemento persoal e melloren a calidade de vidas persoas usuarias dos Servizos de Atención Diúrna.

Para acadar esta finalidade, o/a profesional levará a cabo os seguintes obxectivos:

1. Velar pola promoción da autonomía das persoas con diversidade.
2. Promoción de actividades deportivas adaptadas a persoas con diversidade funcional
3. Conseguir a satisfacción das persoas usuarias á vez que se logran os obxectivos individuais das mesmas.

Responsabilidades

1. Planificación e implementación de actividades deportivas adaptadas para o mantemento e mellora do benestar físico baseadas no Plan Individual de Atención da persoa usuaria.
2. Colaborar na realización de actividades de lecer ou apoio en tarefas como transporte, tarefas en comedor ou vestiarios.
3. Levar a cabo os deberes e responsabilidades deste posto en conformidade cos valores, normas e protocolos da organización, e calquera outra regulación pola cal se rexa a organización.

Especificacións da persoa solicitante do posto

Formación e experiencia

Formación na promoción de actividades físico deportivas.

Habilidades e outros

Valorarase positivamente:

Coñecementos en actividades deportivas pádel e vela

Coñecemento e emprego da Lingua de Signos Española

Certificado de Manipulador de Alimentos

Carné de conducir tipo B1

Formación en monitor de tempo libre

Como presentarse a esta oferta

Se pensas que esa persoa, poderías ser ti, envíanos unha carta de motivación, onde fales das áreas que aparecen na sección “Especificacións da persoa solicitante” e o teu currículo á seguinte dirección de correo electrónico: correo@asociacionambar.org ou cubre o seguinte formulario, antes do 13 de decembro de 2021.

Sobre Ambar

A Asociación Ambar é a asociación pioneira no Barbanza traballando polos dereitos das persoas con diversidade funcional dende 1982. Traballamos día a día para lograr unha comunidade na que as persoas con diversidade funcional teñan igualdade de oportunidades, que as súas contribucións sexan valoradas e os seus dereitos respectados.

Para acadar isto, traballamos:

• prestando apoios para mellorar a calidade de vida a través do deporte inclusivo e das actividades de ocio,
• impulsamos o empoderamento das persoas con diversidade a través da expresión artística e da creatividade,
• aportamos ferramentas para promover a autonomía persoal nos obradoiros ocupacionais do Servizo de Atención Diúrna,
• facilitamos a vida independente dentro da comunidade a través do programa de vivenda con apoio,
• formamos e promovemos o emprego digno na comarca.

Comprometidas e comprometidos pola igualdade de oportunidades

A Asociación Ambar é unha organización que celebra a diversidade e a igualdade de oportunidades no ámbito laboral. Se necesitas información accesible noutros formatos non dubides en poñerte en contacto con nós nos seguintes teléfonos: 981 875 475 ou 607 356 550 (WhatsApp).

Moitas grazas e esperamos saber pronto de ti!