Benvido/a e gracias polo teu interese no posto de Coordinador/a de Comunicación. Este documento inclúe información sobre este posto laboral, o que facemos en Ambar, e os requisitos para postular a esta oferta.

Sobre Nós

Ambar é a asociación pioneira no Barbanza traballando polos dereitos das persoas con diversidade funcional dende 1982. Traballamos día a día para lograr unha comunidade na que as persoas con diversidade funcional teñan igualdade de oportunidades, que as súas contribucións sexan valoradas e os seus dereitos respectados.

Para acadar isto, traballamos:

• prestando apoios para mellorar a calidade de vida a través do deporte inclusivo e das actividades de ocio,

• impulsamos o apoderamento das persoas con diversidade a través da expresión artística e da creatividade,

• aportamos ferramentas para promover a autonomía persoal nos obradoiros ocupacionais do Servizo de Atención Diúrna,

• facilitamos a vida independente dentro da comunidade a través do programa de vivenda con apoio,

• formamos e promovemos o emprego digno na comarca.

Ambar está a vivir unha etapa moi ilusionante trala creación do Plan estratéxico 2021-2023, que marca as próximas prioridades da organización moi en liña coa Convención de Dereitos das persoas con diversidade da ONU e a Estratexia Europea da diversidade, que promoven obxectivos de desinstitucionalización en prol da participación na comunidade así como a promoción da vida independente como chave da mellora da calidade de vida das persoas con diversidade.

Sobre o posto de traballo

Ambar busca unha persoa profesional que coordine a área de Comunicación, e que difunda os proxectos e actividades da asociación, nas canles de comunicación co obxectivo de promover a nosa misión de cara a axentes externos.

A persoa que desenvolve este posto ten a vantaxe de estar nun entorno dinámico en constante crecemento. E ser axente comunicador dos proxectos da entidade fomentando unha visión positiva e apoderadora das persoas con diversidade funcional.

Descrición do posto: Coordinador/a de comunicación

Misión

A misión deste posto difundir a misión e a visión de Ambar a través das canles de comunicación, promovendo unha visión positiva da diversidade.

Responsabilidades

A persoa profesional levará a cabo os seguintes responsabilidades:

1. Xestionar as canles de comunicación externas da entidade en relación á filosofía de traballo e a visión da entidade.

2. Creación de contidos e materiais off e online que reforcen a identidade corporativa de Ambar e se aliñen ca súa perspectiva da diversidade.

3. Busca de tendencias e adaptación ós novos espazos dixitais.

4. Coordinación co resto do equipo á hora de promocionar proxectos, servizos eventos e outras actividades.

Especificacións da persoa solicitante do posto

Formación e experiencia

• Formación en deseño gráfico, comunicación audiovisual, publicidade, belas artes, xornalismo ou outra disciplina vinculada.

Contratación a través das axudas dos Programas de Cooperación, requisitos:

• Estar desempregado/a e inscrito/a no Servizo Público de Emprego de Galicia.

• Estar inscrito como demandante de emprego co código de ocupación 2651.

• Non ter sido contratado/a por un período igual ou superior a seis meses, con cargo ás axudas concedidas polas ordes da Consellería de Economía, Emprego e Industria do 2 de maio de 2018, do 9 de maio do 2019, do 31 de xullo de 2020 e do 3 de agosto de 2021.

Habilidades e outros

• Experiencia previa nun posto similar, valorarase positivamente. 

• Portfolio actualizado, valorarase positivamente.

• Deseño de materiais gráficos tales como carteis, etiquetas, dípticos, catálogos, memorias…

• Fotografía, vídeo e a súa edición

• Xestión de redes sociais: creación de contidos e creatividades, copywriting e análise dos resultados obtidos.

• Redacción de comunicados para prensa

• Coñecementos básicos de SEO e SEM

• Manexo básico de plataformas como WordPress

• Manexo profesional de Adobe Creative Cloud e MS Office.

• Excelente uso do galego, tanto no oral como na escrita.

• Persoa creativa que propoña solucións innovadoras.

• Capacidade de planificación e traballo en equipo

• Capacidade de mellora, ir sempre máis alá, e intentar mellorar proxectos e resultados.

Como presentarse a esta oferta

Se pensas que esa persoa, poderías ser ti, envíanos unha carta de motivación así coma o teu portfolio, onde fales das áreas que aparecen na sección “Especificacións da persoa solicitante” e o teu currículo á seguinte dirección de correo electrónico: talento@asociacionambar.org, ata as 12h do 1 de decembro.

As entrevistas por competencias realizaranse o venres 2 de decembro. Será imprescindible ter experiencia ben fundamentada en postos similares, para pasar á fase de entrevista.

Ambar é unha organización que celebra a diversidade e a igualdade de oportunidades no ámbito laboral. Se necesitas información accesible noutros formatos non dubides en poñerte en contacto con nós nos seguintes teléfonos: 981 875 475 ou 607 356 550 (What’s App)

Moitas gracias e esperamos saber pronto de ti!