Mar Ramón - Asociación Ambar

Mar Ramón

Ourense (1993)

Artista plástica, enmarcada no ámbito da escultura cerámica, comeza a súa traxectoria mentres estudia o grao en Belas Artes continuándoa dende entón no taller en Niñodaguia que comparte coa súa nai.

Despois do grado realiza un master e un doutorado en creación e investigación. No mesmo tempo produce obra plástica que se expón de forma individual e colectiva en diversos espazos de Galicia como o Marco, o CGAC, o Auditorio de Galicia ou o MACUF.

O vínculo coa galería Nordés permítelle expor na edición de Arco de 2021. Grazas a diferentes residencias artísticas traballa en lugares como Arraiolos (Portugal), Altea ou Córdoba. No 2022 consegue o título de doutora grazas a unha investigación sobre o xénero como variable procesual nas obras de arte que teñen os obxectos coma protagonistas.

Preguntas e respostas

Como está sendo a túa experiencia? Traballaras anteriormente con persoas con diversidade funcional?

Esta sendo unha experiencia moi divertida, nunca traballara antes con persoas con diversidade funcional. Encántame o ambiente que hai en Ambar, a empatía que teñen entre eles e con nós, tamén como xorde a comunicación nas clases tanto de forma verbal como plástica.

Consideras que se está abrindo camiño para que as persoas con diversidade funcional poidan desenvolver ou mostrar o seu potencial artístico? Como ves o panorama en xeral? Hai participación?

Non teño moitas nocións sobre o tema. Entendo que estas propostas que se fan no centro son importantísimas. Supoño que a nivel usuario non vexo demasiado esta “participación” ou este “abrir camiño” pero como comentaba na anterior pregunta, é a primeira vez que teño contacto neste contexto.

Ademais de que as persoas con diversidade funcional se apoderen e enxalzar o patrimonio costeiro, que obxectivo ten a peza? Que mensaxe se quer transmitir o público?

A mensaxe desta peza está no propio proceso. Traballamos en pequenas expresións da nosa identidade plástica, xa que vemos como os participantes moitas veces teñen unha personalidade moi marcada á hora de traballar, pero o obxectivo e a esencia penso que é esta idea de comunidade creada a partir de pequenas pezas.

E por último, que nos espera en Mar Diverso, algo que se poida desvelar?

Espéranos a inauguración dunha peza escultórica que funcionará moi ben ca paisaxe e quedará fixa nese espazo.

É un monumento ao patrimonio costeiro a partir da utilización dunha disciplina que ten moita tradición en Galiza, a cerámica. Está elaborado a partir de azulexos feitos á man e amosa, a través de pequenos módulos cadrados, un conxunto unitario.